سید عمار حکیم نے مراجع عظام کو مبارکباد دی / نتائج کی تفصیل

اہل البیت (ع) نیوز ایجنسی ـ ابنا ـ کی رپورٹ کے مطابق عراق کی مجلس اعلی کے سربراہ "سید عمار حکیم" نے عراق میں کامیاب انتخابات کے انعقاد کے سلسلے میں مراجع عظام کو مبارکباد دی ہے۔
اس رپورٹ کے مطابق انھوں نے انتخابات میں عراقی عوام کی وسیع شرکت کے حوالے سے ٹیلیفون پر رابطہ کرکے مراجع تقلید "آيت‌اللہ العظمی سيستاني"، "آيت‏اللہ محمد سعيد الحكيم"، "آيت‌اللہ محمد إسحاق الفياض" اور "آيت‌اللہ بشير النجفي" اور دیگر علماء کرام کو مبارکباد دی۔
انھوں نے عراق کے سیاسی راہنماؤں اور اور اعلی حکام سے بھی رابطہ کیا اور انہیں کامیاب انتخابات کے انعقاد پر مبارک دی۔
سیدعمار حکیم نے اس عظیم کامیابی کو عراق میں جمہوریت کی ترقی اور استحکام کی طرف بڑا قدم قرار دیا اور امید ظاہر کی کہ یہ انتخابات عراق کی تعمیر و ترقی میں اہم کردار ادا کریں گے۔
انھوں نے کہا: ملت عراق کی بیداری اور شعور و آگہی کے باعث عوام نے دہشت گردوں کی دھمکیوں اور خطرات کو خاطر میں نہ لاتے ہوئے ان انتخابات میں بھرپور حصہ لیا۔
سیدعمار حکیم کا پیغام تہنیت وصول کرنے والوں میں صدر "جلال الطالباني " نائب صدر اول "عادل عبد المہدي"، وزیر اعظم "نوري المالكي"، نائب صدر "طارق الہاشمي"، پارلیمان کے سربراہ  "اياد السامرائي"، کردستان ریجن کے سربراہ "مسعود بارزاني"، کردستان ریجن کے وزیراعظم "برہم صالح"، عراق کے نائب وزیراعظم "رافع العيساوي"، سابق وزیراعظم "ڈاکٹر ابراہيم الجعفري" اور عبوری دور کے سابق وزیراعظم  "اياد علاوي"، شامل ہیں۔
........................
عراقی انتخابات میں عوامی شرکت کی تفصیلات کا اعلان
عراقی الیکشن کمیشن نے اعلان کیا ہے کہ عراق کے دو کروڑ ووٹروں میں سے 62 فیصد ووٹروں نے انتخابات میں حق رائے دہی استعمال کیا ہے۔
اہل البیت (ع) نیوز ایجنسی ـ ابنا ـ کی رپورٹ کے مطابق عراقی الیکشن ہائی کمیشن کی سربراہ محترمہ "حمدیہ حسینی" نے بغداد میں پریس کانفرنس سے خطاب کرتے ہوئے کہا کہ مارٹر اور میزائل حملوں کے باوجود انتخابات کے روز (اتوار کو) 62 فیصد عوام ووٹروں نے اپنا ووٹ استعمال کیا۔
انھوں نے عراق کے اٹھارہ صوبوں کے الگ الگ اعداد و شمار بھی جاری کئے اور کہا: انتخابات کے حتمی نتائج آئندہ چند روز میں سامنے آئیں گے۔
انھوں نے کہا: کردستان کی خودمختار علاقے کے صوبہ دہوک میں اسی فیصد ووٹروں نے اپنا حق رائے دہی استعمال کیا ہے اور اس صوبے میں عوامی شرکت ملک کے تمام صوبوں سے زیادہ تھی۔
قابل ذکر ہے کہ انخابات کے روز (اتوار کو) بغداد کے نواح میں مارٹر حملوں کے نتیجے میں 38 افراد جان بحق اور 110 افراد زخمی ہوئے۔
صوبوں میں ووٹروں کی شرکت کے اعداد و شمار:
دہوک 80%
اربیل 76%
سلیمانیہ 73%
کرکوک 73%
صلاح الدین 73%
نینوا 66%
بابل 63%
دیالہ 62%
کربلا 62%
الانبار 61%
نجف 61%
المثنی 61%
ذی قار 60%
واسط 60%
 بصرہ 57%
بغداد 53%
میسان 50%
........................
/110